Kryetari i Partisë Demokratike të Kosovës (PDK), Memli Krasniqi ka bërë një vizitë në Prizren ku është takuar edhe me kryetarin e kësaj komune, Shaqir Totaj.

Me anë të një postimi në Facebook, Krasniqi thotë se Shaqir Totaj është model i qeverisjes së mirë, shkruan Arbresh.info.

“Model i qeverisjes së mirë, e cila kryen punë, i realizon premtimet dhe është gjithmonë në shërbim të qytetarëve. Ky është suksesi i Kryetarit Shaqir Totaj dhe ekipit të tij, të cilët çdo ditë e më shumë po e transformojnë qytetin dhe po e përmirësojnë jetën e qytetarëve të Prizrenit, përmes investimeve të shumta në infrastrukturë, si kjo e revitalizimit të rrugës “Shuaib Spahiu”, që filloi sot në zonën historike të qytetit.”, ka shkruar ai.

Sipas Krasniqit, të kënaqur me punën e kryetarit janë edhe fermerët e komunës, por edhe artistët e Shoqërisë Kulturore Artistike “Agimi”.

“Të kënaqur me mbështetjen dhe punën e qeverisjes lokale janë edhe fermerët e komunës, por edhe artistët e Shoqërisë Kulturore Artistike “Agimi”, të cilët i takuam sot, për të bashkëbiseduar me ta.”, tha ai.

Tutje ai tha se këtë model të qeverisjes, PDK do ta jetësoj edhe në nivelin qendror.

“Këtë model të qeverisjes – me qytetarin në qendër, që kaq shumë po i mungon sot Kosovës, PDK do ta jetësoj edhe në nivelin qendror.”, u shpreh kreu opozitar./Arbresh.info/